Hoppa yfir valmynd
1.3.2015
Látlaus umferðaraukning á Keflavíkurflugvelli

Látlaus umferðaraukning á Keflavíkurflugvelli

Ekkert lát verður á farþegaaukningu á Keflavíkurflugvelli í sumar. Alls munu 19 flugfélög halda uppi ferðum þaðan til 73 áfangastaða um háannatímann. Sætaframboð  í sumaráætlun eykst um 13% frá fyrra ári en áætlað er að heildarfjöldi farþega á árinu verði 4,5 milljónir sem er 16% aukning frá því í fyrra. Árleg farþegaaukning nokkur undanfarin ár hefur verið á bilinu 15 – 20%. 
 
 
Nokkrir nýir áfangastaðir bætast í áætlun flugfélaganna í sumar. Portland í Bandaríkjunum og Birmingham í Bretlandi eru nýir áfangastaðir Icelandair og áætlar félagið að fljúga allt árið til Birmingham. WOW Air mun einnig hefja flug til Bandaríkjanna í vor og hyggst fljúga til Boston og Baltimore allt árið. Dublin, Tenerife og Amsterdam einnig nýir heilsársáfangastaðir hjá WOW Air og félagið mun hefja flug til Rómar og Billund í sumar.
 
EasyJet flýgur til 8 áfangastaða allt árið og bandaríska flugfélagið Delta lengir flugtímabil sitt um 6 vikur frá því á fyrra ári. Þá bætir spánska félagið Vueling við flugi til Rómar og Lufthansa flýgur til Frankfurt og Munchen.
 
Ráðgert að afgreiða allt að 25 farþegaflug um háannatíma að morgni og síðdegis flesta daga vikunnar en allmargar flugvélar eru jafnframt einnig afgreiddar um hádegisbil og miðnætti.