Langar þig að læra að stjórna flugumferð?

Isavia annast rekstur íslensku flugleiðsöguþjónustunnar og er eini starfsvettvangur flugumferðastjóra á Íslandi. Flugumferðarstjórar stýra flugumferð á flugvöllum á Íslandi og í íslenska flugstjórnarsvæðinu sem er 5,4 milljónir ferkílómetrar að stærð og eitt það stærsta í heiminum. Isavia og forverar þess hafa jafnan annast alla þjálfun flugumferðarstjóra en áætlað er að þjálfa þurfi að meðaltali sex nýja flugumferðarstjóra árlega næstu árin.

Sjá kynningarmyndbönd um nám í flugumferðarstjórn og flugumferðarstarfsemi hjá Isavia og Tern:

Til þess að hefja nám í flugumferðarstjórn þurfa einstaklingar:

  • Að hafa náð 18 ára aldri
  • Lokið stúdentsprófi eða sambærilegu námi.
  • Tala og rita góða íslensku og ensku.
  • Að vera góðir í mannlegum samskiptum
  • Að vera sjálfstæðir í vinnubrögðum.
  • Að standast læknisskoðun skv. reglugerð um skírteini flugumferðarstjóra.

Hæfir umsækjendur verða boðaðir í inntökupróf. Sérstök athygli er vakin á því að nemar sem teknir verða inn í grunnnám í flugumferðarstjórn hjá Isavia munu ekki greiða skólagjöld.

Lokað hefur verið fyrir umsóknir um nám í flugumferðarstjórn fyrir námsárið 2018.

 

Nám hjá Isavia í flugumferðastjórn er frábrugðið öðru námi. Námið skiptist í þrjá hluta (grunnnám, áritunarnám og starfsþjálfun) og stífar kröfur eru gerðar um námsárangur í hverjum hluta.

Grunnnám er kennt að mestu í fjarnámi og byrjar í janúar 2018 og lýkur í maí. Nemar koma þó í tíma og próf reglulega á tímabilinu. Grunnnámið samanstendur af námskeiðum um flugleiðsögu, veðurfræði, flugleiðsögukerfi, flugvélar, mannþáttafræði, lög flugleiðsögu, vinnuumhverfi flugumferðastjóra og fleiru. Fjarnáminu lýkur með 2 vikna kúrs sem er kenndur í dagskóla. Grunnnámi lýkur í maí 2018.

Áritunarnám hefst í september 2018. Áritunarnámið er kennt í dagskóla (8-16) þar sem að nemar eru í fyrirlestrum, æfingum og vinnu í flugstjórnarhermi. Áætlað er að þessum hluta verði lokið í febrúar 2019.

Starfsþjálfun getur verið mismunandi lengi eftir því hvernig nema gengur en áætlað er að nemar séu að ljúka náminu haust-vetur 2019. Í starfsþjálfun fer nemi inn á vaktir og starfar undir handleiðslu flugumferðastjóra. Í starfsþjálfun þarf nemi að uppfylla ákveðin framfaramöt reglulega sem hluti af námi sínu. Á meðan nemi er í starfsþjálfun fær hann greiddan mánaðarlegan námsstyrk. 

 

Algengar spurningar

Hvað kostar námið? Þeir sem verða valdir í námið greiða engin skólagjöld.

Hvað með námsgögn og bækur? Isavia sér nemanum fyrir öllum þeim námsgögnum sem þarf í náminu. Einnig þá sér Isavia fyrir spjaldtölvu í grunnnáminu sem getur tengst fjarnámsefninu.

Hvar er kennt? Kennsla fer fram í flugstjórnarmiðstöðinni í Reykjavík, við hliðina á höfuðstöðvum Isavia á Reykjavíkurflugvelli.

Hvar mun viðkomandi starfa ef hann verður flugumferðastjóri? Fyrir námsárið 2018 erum við að velja inn nema sem munu fara í starfsþjálfun í flugstjórnarmiðstöðinni í Reykjavík. Ekki er reiknað með að nemar verði sendir í starfsþjálfun í flugturnum Keflavíkur-, Reykjavíkur- eða Akureyrarflugvallar.

Er ég of ungur/of gamall til að sækja um? Umsækjendur þurfa að vera orðnir 18 ára þegar nám hefst. Ekki er hægt að veita skírteini flugumferðastjóra ef viðkomandi er 63 ára eða eldri.

Ég er ekki með stúdentspróf, get ég sótt um? Hægt er að sækja um þó að viðkomandi sé ekki með stúdentspróf (eða sambærilega menntun) svo lengi sem áætluð námslok eru fyrir janúar 2018.

Hvernig eru inntökuprófin fyrir námið? Við sendum út upplýsingar um prófin þegar búið er að fara yfir umsóknirnar. Almenna reglan er að við erum með próf sem krefjast ekki sérstaks lesefnis og eru að skoða færni á ákveðnum sviðum (t.d. ensku, reikningi, þrautalausn, rýmisgreind og margt fleira). Valferlið er margþætt og inniheldur próf, verkefni, viðtöl og fleira. 

Hvenær má ég vænta svar um hvort ég komist að eða ekki? Valferlið tekur sinn tíma og þó að við reynum að svara samviskusamlega á öllum stigum ferlisins þá getur það því miður dregist. Valferlinu er skipt í lotur og svarað er eftir hverja lotu um hverjir komast áfram. Reiknað er með að endanlegt val liggi fyrir í lok október-byrjun nóvember.

Hvað er flugumferðastjóri með í laun/hvað greiðir þið í nemastyrk? Því miður þá höfum við þann vana að birta ekki þær tölur á netinu eða í pósti. Þær upplýsingar standa til boða þegar viðkomandi er boðaður í viðtöl í lok ferlisins.

 

Fyrirmyndarfyrirtæki í stjórnarháttum Isavia gullmerki PWC Tern Systems Fríhöfnin