Stjórnarhættir

Isavia ohf. er opinbert hlutafélag sem annast rekstur, viðhald og uppbyggingu áætlunarflugvalla og lendingarastaða á Íslandi. Auk þess veitir félagið flugleiðsöguþjónustu í innanlandsflugi og alþjóðaflugi yfir norðanverðu Norður-Atlantshafi á 5,4 milljón ferkílómetra svæði. Félagið tryggir flugöryggi og flugvernd í samræmi við viðurkenndar alþjóðlegar öryggiskröfur og aðferðir og þjóðréttarlegar skuldbindingar undir eftirliti og með starfsleyfi Samgöngustofu.

Starfsemi félagsins var undir Flugmálastjórn Íslands og Flugmálastjórn Keflavíkurflugvallar til ársins 2006 þegar flugleiðsöguþjónusta og flugvallarekstur Flugmálastjórnar Íslands var skilinn frá stjórnsýslu- og eftirlitsstarfsemi stofnunarinnar. Tók nýstofnað opinbert hlutafélag, Flugstoðir, við ofangreindum rekstrarþáttum sem lutu faglegri yfirstjórn Samgönguráðuneytis sem jafnframt var kaupandi að þjónustu félagsins við stjórnvöld. Við brotthvarf varnarliðsins frá Keflavíkurflugvelli árið 2006 var Flugmálastjórn Keflavíkurflugvallar falinn allur rekstur flugvallarins en Flugstöð Leifs Eiríkssonar ohf. annaðist rekstur flugstöðvarinnar sem fyrr. Reksturinn laut umsjón utanríkisráðuneytisins þar til í ársbyrjun 2008 er hún færðist til samgönguráðuneytisins.

Opinbera hlutafélagið Keflavíkurflugvöllur var stofnað árið 2008 til þess að annast rekstur, viðhald og uppbyggingu flugvallarins og flugstöðvarinnar ásamt þjónustu við flugrekendur og hagnýtingu flugvallarins í þágu öryggis- og varnarmála. Félagið tók til starfa 1. janúar 2009 og fór samgönguráðherra með hlutinn fyrir hönd ríkisins til ársloka 2009 þegar ábyrgð á hlut ríkisins í opinberum hlutafélögum færðist til fjármálaráðherra.

Þann 1. maí 2010 sameinuðust opinberu hlutafélögin Flugstoðir og Keflavíkurflugvöllur í eitt félag sem hlaut nafnið Isavia ohf. Með sameiningunni var lagður grunnur að nýrri starfsemi og þjónustu á sviði flugs og viðskipta. Fjármála- og efnahagsráðherra fer með hlut ríkisins í félaginu en samgönguráðherra hefur faglegt eftirlit með starfseminni.

STJÓRNARHÆTTIR

Stjórnarhættir félagsins taka mið af lögum nr. 2/1995 um hlutafélög, almennri eigendastefnu ríkisins frá ágúst 2012, samþykktum félagsins og starfsreglum.

Stjórn félagsins hefur „Leiðbeiningar um stjórnarhætti fyrirtækja“ til hliðsjónar í störfum sínum og uppfyllir þær í öllum meginatriðum þrátt fyrir að félaginu beri ekki að fylgja leiðbeiningunum lögum samkvæmt. Engar formlegar undirnefndir stjórnar eru starfandi, s.s. endurskoðunar-, tilnefningar- eða starfskjaranefndir. Stefna hefur verið sett um samfélagslega ábyrgð.

STJÓRN

Stjórn Isavia er skipuð fimm aðalmönnum og fimm varamönnum sem kjörnir eru á hluthafafundi til eins árs í senn. Stjórnarmenn eru tilnefndir af fjármála- og efnahagsráðherra fyrir hönd eigandans, íslenska ríkisins.

STÖRF OG STARFSREGLUR STJÓRNAR

Stjórnin hefur sett sér ítarlegar starfsreglur þar sem helstu verkefni og valdsvið stjórnar og forstjóra eru skilgreind. Gildandi starfsreglur voru samþykktar á stjórnarfundi þann 6. apríl 2017. Þar er m.a. að finna skiptingu starfa innan stjórnar, reglur um hæfi stjórnarmanna til þátttöku í afgreiðslu mála, um fundarsköp og fundargerðir, reglur um þagnarskyldu, upplýsingagjöf gagnvart stjórn og ákvörðunarvald stjórnar.

Stjórnin hefur æðsta vald í málefnum félagsins á milli hluthafafunda samkvæmt lögum og samþykktum félagsins. Meginhlutverk stjórnar er að stýra félaginu milli hluthafafunda og tryggja að nægilegt eftirlit sé haft með reikningshaldi og meðferð fjármuna félagsins auk þess að staðfesta rekstrar- og fjárfestingaáætlanir og sjá til þess að þeim sé fylgt. Stjórn tekur meiriháttar ákvarðanir í rekstri félagsins og sér um að félagið sé rekið í samræmi við lög og reglur sem félaginu ber að fylgja. Þá hefur starf stjórnar það að markmiði að stuðla að viðgangi félagsins og tryggja árangur þess til langs tíma litið með því að setja félaginu stefnu í samstarfi við stjórnendur þess.

ÁRANGURSMAT

Stjórn metur störf sín með reglubundnum hætti, verklag og starfshætti, framgang félagsins, frammistöðu forstjóra og skilvirkni undirnefnda, séu þær starfandi. Árangursmat felur m.a. í sér mat á styrkleika og veikleika í störfum og verklagi og einnig er hugað að málefnum sem stjórnin telur að betur megi fara. Síðasta árangursmat var framkvæmt í desember 2016.

INNRA EFTIRLIT OG ÁHÆTTUSTÝRING

Stjórn hefur sett fram heildstæða áhættustefnu félagsins og skilgreint helstu áhættuþætti í rekstri. Helstu áhættur sem fylgja fjármálagerningum samstæðunnar eru gengisáhætta, vaxtaáhætta og verðtryggingaráhætta.

Sérstök áhættunefnd er starfandi og hefur hún umboð stjórnar til að ákvarða m.a. umfang og eðli mats á áhættu og arðsemisgreininga fyrir framkvæmdir og verkefni sem haft geta marktæk áhrif á rekstur og efnahag. Áhættunefnd er með reglubundna skýrslugjöf um áhættur félagsins til stjórnar. Félagið hefur ekki starfandi innri endurskoðanda, en endurskoðendur félagsins vinna afmarkaðar úttektir á ferlum félagsins.