STARFSFÓLK

Samskipti við og milli starfsfólks fara fyrst og fremst fram á reglubundnum starfsmannafundum forstjóra, innri vef félagsins og viðburðum á vegum starfsmannafélagsins.

Til að auka frekar upplýsingaflæði til starfsfólks og veita því tækifæri til þess að greina frá störfum sínum og skiptast á skoðunum var settur upp innri vefur árið 2015 sem hlaut nafnið Flugan. Vefurinn er hugsaður sem samfélagsmiðill sem tengir starfsfólk saman og geta allir sett inn færslur, myndir og myndbönd sem þeir vilja deila með samstarfsfólki sínu. Flugan er einnig öflug fréttaveita fyrir stjórnendur og einföld leið til að koma upplýsingum til allra starfsmanna samtímis. Starfsfólk getur einnig sótt þangað ýmis tæki og tól til notkunar við störf sín og haldið utan um skráningar á viðburði, námskeið og skemmtanir á vegum fyrirtækisins. Þess má geta að Flugan var valin besti innri vefur ársins á Íslensku vefverðlaununum árið 2015 og var tilnefnd til sömu verðlauna árið 2016. Starfsmannafélag Isavia og dótturfyrirtækja, Staffið, stuðlar að fjölbreyttu og öflugu félagslífi og skipuleggur fjölda viðburða fyrir félagsmenn, t.d. fjölskyldudag á sumrin, jólahlaðborð, bíóferðir og keilukvöld. Auk þess hefur félagið samið um afsláttakjör fyrir starfsfólk hjá fjölmörgum fyrirtækjum. Öllu starfsfólki býðst aðild að Staffinu.

Félagið leggur áherslu á gott og fjölskylduvænt starfsumhverfi, öfluga fræðslu og þjálfun og jákvæðan starfsanda. Markvisst er unnið að endurnýjun starfsstöðva og var til að mynda tekin í notkun á síðasta ári ný starfsaðstaða fyrir starfsfólk flugverndar á Keflavíkurflugvelli. Nú standa yfir framkvæmdir á nýrri aðstöðu fyrir starfsfólk flugvallarþjónustu á Keflavíkurflugvelli.