Móðurfélagið Isavia rekur Keflavíkurflugvöll. Á Keflavíkurflugvelli starfa tvö kjarnasvið félagsins. Annars vegar viðskipti og þróun og hins vegar þjónusta og rekstur. Stoðsvið eru tvö, annars vegar er fjármála- og mannauðssvið og hins vegar stafræn þróun og upplýsingatækni. Leiðtogar kjarna- og stoðeininga mynda framkvæmdastjórn félagsins ásamt forstjóra.
Sveinbjörn Indriðason er hagfræðingur frá Háskóla Íslands 1998. Hann starfaði hjá Fjárfestingarbanka atvinnulífsins og vann við áhættustýringu hjá Icelandair frá 1999 til 2005. Sveinbjörn var framkvæmdastjóri fjármálasviðs FL Group frá 2005 til 2008 og rekstrar- og fjármálastjóri nýsköpunarfyrirtækisins Clara frá árinu 2011. Sveinbjörn var framkvæmdastjóri fjármálasviðs Isavia frá árinu 2013 þar til í júní 2019 þegar hann var ráðinn forstjóri Isavia.
Forstjóri félagsins hefur með höndum stjórn allrar daglegrar starfsemi skv. stefnu og fyrirmælum stjórnar. Daglegur rekstur nær ekki til ráðstafana sem eru óvenjulegar eða mikilsháttar. Hann hefur ákvörðunarvald um öll rekstrar- og fjárhagsleg málefni félagsins og hefur umsjón með eignum þess. Forstjóri gerir stjórn grein fyrir starfsemi félagsins og afkomu á stjórnarfundum og ber ábyrgð gagnvart stjórn á daglegum rekstri og að í öllu sé farið eftir samþykktum félagsins, lögum og reglum.
Anna Björk Bjarnadóttir er íþróttafræðingur frá Íþróttaháskólanum í Osló (NIH) og Hungarian University of Physical Education (HUPE) og með framhaldsnám í leiðtoga- og markaðsfræðum á vegum TDC, DIEU/Mannaz og Wharton Business School.
2018 til 2020 var hún framkvæmdastjóri ráðgjafar og sérlausna hjá Advania. Á árunum 2013 til 2018 var hún stjórnunarráðgjafi og framkvæmdastjóri Expectus. Áður starfaði hún í átta ár hjá Símanum, þar af í fimm ár sem framkvæmdastjóri einstaklingssviðs og svo tæknisviðs. Hún stýrði þjónustusviði TDC Norway A/S frá 2001 til 2004.
Anna Björk var ráðin sem framkvæmdastjóri þjónustu og rekstrar Isavia árið 2020.
Þjónusta og rekstur annast öryggisstjórnun, flugvernd, þjónustu við farþega, flugvallarþjónustu og sér um rekstur flugturnsins.
Bjarni Örn Kærnested er með B.Sc., gráðu í tölvunarfræði frá Háskólanum í Reykjavík og MBA frá Waseda háskólanum í Japan. Bjarni hefur starfað sem forstöðumaður á upplýsingatæknisviði hjá Össuri frá árinu 2019 þar sem hann hefur borið ábyrgð á fjármálum og rekstri upplýsingatæknisviðsins og alþjóðlegri verkefnastofu fyrirtækisins. Áður starfaði hann sem forstöðumaður miðlægra lausna hjá Origo og á upplýsingatæknisviði Arion banka þar sem hann tók m.a. þátt í að móta og þróa stafræna vegferð bankans. Bjarni tók við sem framkvæmdastjóri stafrænnar þróunar og upplýsingatækni árið 2022.
Starfræn þróun og upplýsingatækni hefur með höndum upplýsingatæknirekstur félagsins og leiðir stafræna þróun.
Elísabet Sverrisdóttir er með B.A. gráðu í Bókmenntum frá Háskóla Íslands, MS gráðu í Mannauðsstjórnun frá sama skóla og APME í Verkefnastjórnun frá Háskólanum í Reykjavík. Frá 2006 til 2017 starfaði hún við mannauðsráðgjöf og ráðningar hjá ráðgjafarfyrirtækinu Hagvangi.
Elísabet var ráðin sem mannauðsráðgjafi til Isavia 2017, var mannauðsstjóri félagsins frá árinu 2019 og árið 2021 tók hún við sem aðstoðarmaður forstjóra.
Guðmundur Daði Rúnarsson er rekstrarverkfræðingur frá Danmarks Tekniske Universitet 2010. Á árunum 2007 til 2011 starfaði Daði sem verkefnastjóri á upplýsinga- og tæknisviði Iceland Express. Hann var ráðinn deildarstjóri rekstrardeildar í Flugstöð Leifs Eiríkssonar árið 2011, síðar aðstoðarframkvæmdastjóri Flugstöðvar Leifs Eiríkissonar og við skipulagsbreytinguna 2016 framkvæmdastjóri tækni og eignasviðs Keflavíkurflugvallar. Árið 2020 tók hann við sem framkvæmdastjóri viðskipta og þróunar.
Viðskipti og þróun annast samskipti við flugfélög og leiðarþróun, viðskipta og markaðsmál, rekstur og uppbyggingu innviða og mannvirkja ásamt flugvallarþróun og uppbyggingu flugvallarins.
Ingibjörg Arnarsdóttir er með Cand. Oecon. gráðu í viðskiptafræði frá Háskóla Íslands með áherslu á endurskoðun og meistaragráðu í fjármálum frá Cass Business School/City University í London. Á árunum 2016-2020 starfaði Ingibjörg sem framkvæmdastjóri fjármála-, mannauðs- og verkefnastjórnar hjá Reiknistofu bankanna og á árunum 2008-2016 sem framkvæmdastjóri fjármála og manauðs. Síðan sem framkvæmdastjóri stjórnunar- og mannauðs hjá Valitor. Árið 2020 tók hún við starfi framkvæmdastjóra fjármála og mannauðs.
Fjármál og mannauður hefur með höndum mannauðsmál, reikningshald, fjárstýringu, áhættustýringu, hagdeild, fjármögnun, lögfræðileg málefni og innkaup.
