Isavia styrkir margvíslega starfsemi um allt land

Íþróttabandalag Akureyrar tók við styrk úr samfélagssjóðnum úr hendi Hjördísar Þórhallsdóttur umdæmisstjóra Isavia á Norðurlandi við hátíðlega athöfn í Flugsafni Íslands á Akureyrarflugvelli. Styrkurinn mun nýtast vel í það fjölbreytta starf sem unnið er innan vébanda ÍBA. 

Fjöldi verkefna um allt land naut góðs af haustúthlutun styrktarsjóðs Isavia. Sjóðurinn veitti styrk til íþróttastarfs barna og unglinga á Vestfjörðum, Norðurlandi og Austurlandi auk þess sem fjölbreytt önnur verkefni hlutu styrk, meðal annars má nefna ferðastyrki til hjartveikra barna í sumarbúðir á Norðurlöndum, styrki til dreifingar á fræðsluefni um einelti á leikskólastigi, styrki til kaupa á píanói sem ætlað er til raddþjálfunar Parkinsons sjúklinga og styrkur til að halda Fest Afrika á Íslandi. Einnig var veittur styrkur til ráðstefnuhalds Future Fiction en ráðstefnan hefur það að markmiði að fjalla um tækifæri og möguleika á Miðnesheiði eftir að starfsemi herstöðvarinnar var lögð niður.

Verkefnin sem hlutu styrk voru:

•  Neistinn styrktarfélag hjartveikra barna
•  Parkinson samtökin á Íslandi
•  Aðalheiður Sigurðardóttir – Ég er Unik, fyrirlestrar um einhverfu
•  Afrika Lole – styrkur til þess að halda Fest Afrika
•  Harpa Lúthersdóttir og Leikskólar Rekjanesbæjar – fræðsluefni um einelti undir heitinu  Viltu vera  memm. 
•  Skátafélagið Heiðabúar – styrkur til kaupa á búnaði
•  Future fiction – styrkur til ráðstefnuhalds Ásbrú. 
• Héraðssamband Vestfirðinga – styrkur til íþróttastarfs barna og unglinga
• Héraðssamband Bolungarvíkur – styrkur til íþróttastarfs barna og unglinga
• Íþróttabandalag Akureyrar – styrkur til íþróttastarfs barna og unglinga
• Ungmenna- og íþróttasamband Egilsstaða – styrkur til íþróttastarfs barna og unglinga

Björn Óli Hauksson, forstjóri Isavia og Þröstur Söring, framkvæmdastjóri rekstrarsviðs Keflavíkurflugvallar veittu fjölbreyttum verkefnum styrki á Keflavíkurflugvelli. 

Jörundur H. Ragnarsson umdæmisstjóri Isavia á Austurlandi veitti styrk til Ungmenna- og íþróttasambands Austurlands. Börnin tóku styrknum fagnandi og veitingunum einnig.