Vel heppnuð flugslysaæfing í Grímsey

Flugslysaæfing var haldin í Grímsey í dag þar sem æfð voru viðbrögð við ímynduðu flugslysi. Fjöldi viðbragðsaðila auk heimamanna tók þátt í æfingunni sem var vel heppnuð. Flugslysaæfingar Isavia eru almannavarnaæfingar og eru jafnan með stærstu hópslysaæfingum sem haldnar eru ár hvert og mikilvægar heildarviðbragðskerfi Íslands hvort sem um flugslys eða önnur hópslys er að ræða. Frá árinu 1996 hefur Isavia haldið yfir 40 flugslysaæfingar.

Æfðar eru björgunar- og slökkviaðgerðir, greining og aðhlynning slasaðra auk umönnunar óslasaðra og aðstandenda. Auk þess er áhersla lögð á samhæfingu vegna flutnings slasaðra, boðunarkerfi, stjórn, samhæfingu, fjarskipti, rannsókn á vettvangi og fleira.

Um tvær til fjórar æfingar eru haldnar ár hvert, en stór flugslysaæfing er haldin á hverjum flugvelli á fjögurra ára fresti. Æfingarnar byggja á flugslysaáætlun sem gerð hefur verið fyrir hvern flugvöll. Að æfingu lokinni eru viðbrögð rýnd og kannað hvað var gert vel og hvað mætti bæta.

Fjöldi viðbragðsaðila taka þátt í æfingunum, meðal annarra Isavia, almannavarnardeild ríkislögreglustjóra, slökkvilið, lögregla, heilbrigðisstofnanir, sjúkraflutningar, björgunarsveitir, Rauði krossinn, Landhelgisgæslan, Neyðarlínan og prestar.

Þátttakendur í æfingunni í Grímsey komu úr ýmsum áttum:

Starfsmenn Isavia á flugvellinum

Starfsmaður Norlandair

Slökkvilið Akureyrar í Grímsey

Björgunarsveitin Sæþór í Grímsey

Aðgerðastjórn á Akureyri

Áhöfn björgunarskipsins Sigurvins á Siglufirði

Lögregla

Landhelgisgæslan

Greiningarsveit Sjúkrahúss Akureyrar

Íbúar Grímseyjar