Viðhaldsframkvæmdir á innanlandsflugvöllum frá árinu 2008

Vegna umfjöllunar í fjölmiðlum undanfarið hefur Isavia tekið saman þær viðhaldsframkvæmdir sem gerðar hafa verið á flugvöllum í innanlandsflugvallakerfi Íslands síðan árið 2008. Auk þess eru í samantektinni upplýsingar um framlag ríkisins til viðhaldsframkvæmda ár hvert. 

Innanlandsflugvallakerfið er í eigu ríkisins og Isavia sér um daglegan rekstur þess í samræmi við þjónustusamning við innanríkisráðuneytið. Í samningnum er ákvarðað þjónustustig á flugvöllum, hvaða flugvöllum skal halda opnum, fjármagn til rekstrar og fjármagn til viðhalds. Árleg viðhaldsþörf á þessum samgönguinnviðum er um það bil 600 milljónir króna.

Upplýsingum um kostnað við viðhald og endurbætur á flugvöllum í innanlandskerfi frá árinu 2008 er að finna í árlegum skýrslum innanríkisráðherra um framkvæmd samgönguáætlunar en þeim er dreift á Alþingi á hverju ári. Eftirfarandi er samantekt úr þeim skýrslum.

Til frekari samanburðar á framkvæmdakostnaði milli ára er taflan hér að ofan færð til verðlags í mars 2015:

Eftirfarandi mynd sýnir núvirt fjárframlög ríkisins til framkvæmda á flugvöllum í innanlandskerfi á árunum 1988 til 2015. Árið 2008 sker sig nokkuð úr en þá var fé veitt  til flugbrautarlengingar og nýs aðflugsbúnaðar á Akureyrarflugvelli. Myndin endurspeglar í raun þann vanda sem við er að etja á innanlandsflugvöllum, þ.e. hve dregið hefur úr fjárveitingum til viðhalds þeirra. Viðhaldsþörf flugvallakerfisins í heild er um 600 m.kr. í venjulegu árferði. Við þá fjárhæð bætast nýframkvæmdir, svo sem lenging flugbrauta, stækkun flughlaða, nýr flugleiðsögubúnaður og fleira.

Samhliða umtalsverðum niðurskurði á fjárveitingum til viðhalds hefur framlag ríkisins til reksturs flugvalla í innanlandskerfinu einnig dregist saman um 30% að raunvirði. Hefur því verið mætt með hagræðingu á öllum flugvöllum og hækkun notendagjalda á Reykjavíkurflugvelli jafnframt því sem gengið hefur verið á eigið fé Isavia. Eftirfarandi mynd sýnir þróun fjárveitinga til rekstrar, annars vegar rauntölur á verðlagi hvers árs og hins vegar hverjar þær hefðu þurft að vera til þess að haldast í hendur við fjárveitingar ársins 2008 að raungildi.

Ónýttar fjárveitingar til framkvæmda og viðhalds eru samkvæmt ákvæði þjónustusamnings innanríkisráðuneytis við Isavia færðar milli ára, enda eru þær í öllum tilfellum ætlaðar tilgreindum verkefnum á flugvöllum ríkisins. Algengt er að heimildir til framkvæmda fáist ekki fyrr en langt er liðið á árið og þá næst þá oft ekki að ljúka við framkvæmdir á því ári. Sem dæmi má nefna að samningur um framkvæmdir og viðhald ársins 2015 var undirritaður í júní 2015 og gátu þá útboð vegna verkefnanna  fyrst hafist. Eftirfarandi tafla sýnir færslur á fjármagni milli ára. Þær eru eingöngu vegna framkvæmdaverkefna, ekki reksturs.