Hoppa yfir valmynd

Bílastæðaskilmálar

AIRPORT PARKING BÓKUN Á NETINU - SKILMÁLAR

    1.  Samningsaðilar

    2.  Bókun

    3.  Greiðsla

    4.  Þjónustan

    5.  Afhent/sótt

    6.  Póstlisti

    7.  Verð

    8.  Breytingar á bókun

    9.  Tafir

    10. Kvartanir

    11. Vanefndir

    12. Ábyrgð

    13. FORCE MAJEURE

    14. Persónuupplýsingar

    15. Kvartanir

    16. Lög og lögsaga

    17. Endurskoðun/breyting skilmála

    1. Samningsaðilar

    1.1. Þegar þú bókar bílastæði á https://www.kefairport.is/ kemst á bindandi samningur milli þín og Isavia ohf. kt. 550210-0370 og þessir skilmálar gilda.

    1.2. Þegar bókun hefur verið staðfest mun Isavia taka frá bílastæði fyrir þig í þann tíma og á því svæði sem bókað hefur verið. Bílastæði eru ekki númeruð.

    1.3. Hægt er að hafa samband við bílastæðaþjónustu Isavia í síma 425-6400 eða með tölvupósti á póstfangið parking@isavia.is , heimasíða Isavia er https://www.isavia.is/

    2. Bókun

    2.1. Hægt er að bóka bílastæði á https://www.kefairport.is/. Einungis er hægt að bóka eitt bílastæði hverju sinni og bókun verður að vera yfir óslitið tímabil. Yfirgefir þú bílastæði og keyrir inn á það aftur á tímabili bókunar er litið á það sem ný viðskipti sem þú þarft að greiða fyrir samkvæmt gildandi gjaldskrá.

    2.3. Bóka verður bílastæði a.m.k. 4 tímum fyrir innkeyrslu á bílastæðið.

    2.4. Hámarkstími bókunar á bílastæðum eru 14 vikur yfir óslitið tímabil.

    2.5. Ef bókað er í styttri tíma en 14 vikur er hægt að lengja bókun upp í 14 vikur að hámarki á https://www.kefairport.is/.

    2.6. Bókun bílastæða samkvæmt 2.4 og 2.5 er háð því að bílastæði séu til reiðu yfir allt það tímabil sem þú vilt bóka.

    2.7. Að lokinni bókun er bókunarstaðfesting send á tölvupóstfangið þitt, í bókunarstaðfestingu má finna bókunarnúmer og kvittun. Isavia geymir afrit af þessari bókunarstaðfestingu og má nálgast það með því að hafa samband við Isavia.

    3. Greiðsla

    3.1. Gjald fyrir bílastæði á Keflavíkurflugvelli er háð því hvaða bílastæði er valið og fjölda daga sem bílastæði er bókað.

    3.2. Gjald er greitt fyrir bílastæði um leið og bókað er, sjá grein 2.7.

    3.3. Þegar bílastæði er bókað er mögulegt að greiða með Visa, Mastercard.

    3.4. Þegar greitt er þarft þú að slá inn kortanúmer, gildistíma korts og öryggiskóða á bakhlið korts.

    3.5. Akir þú bifreið út af bílastæðum áður en bókunartími er útrunninn átt þú ekki rétt á endurgreiðslu þess tímabils sem bílastæði var ekki notað.

    3.6. Ef, af einhverri ástæðu, þú sækir ekki bifreið áður en bókunartími rennur út verður almennt dagsgjald þess bílastæðis sem bifreið er lagt á rukkað frá því tímabili sem bókun endar og þangað til bifreið er sótt. Greiða verður gjaldið áður en bifreið er ekið út af bílastæðinu.

    4. Þjónustan

    4.1. Til þess að komast inn á bílastæðin þarft þú að nota QR kóða (e. Quick Response Code) sem þú færð í bókunarstaðfestingu. QR kóðinn er borinn upp að skynjara í hliði. Til þess að komast út af bílastæðum þarft þú að nota sama QR kóða í úthliði.

    4.2. Tímabil bókunar bílastæðis er tilgreint í bókun. Keyrir þú inn á bílastæði fyrr en tilgreint er í bókun gildir sá tími. Keyrir þú seinna af bílastæðum en tilgreint er í bókun, gildir sá tími. Fyrir tíma utan bókunar skal greiða almennt daggjald þess bílastæðis sem bíl er lagt á.

    5. Lagning

    5.1. Ef þú kaupir „Lagning“ þjónustu gildir grein 5 auk annarra ákvæða skilmála þessara um þig.

    5.2. Þegar þú mætir á Keflavíkurflugvöll skalt þú leggja á skammtímastæði P1, brottfararmegin, og skila lyklum í þar til gert hólf í brottfararsal Flugstöðvar Leifs Eiríkssonar (flugstöðvarinnar). Starfsmenn Isavia taka myndir af bifreið og keyra á bílastæði fjær flugstöðinni. Við heimkomu sækir þú lykla í afgreiðslu bílastæðaþjónustu Isavia. Til þess að fá lykla afhenta þarft þú að sýna bókunarstaðfestingu. Bifreið verður tilbúin fyrir þig á komustæðum P2. Nánari leiðbeiningar eru að finna í bókunarstaðfestingunni sem þú færð þegar þú bókar.

    Skilir þú ekki lyklum í þar til gert lyklabox skaltu greiða dagsgjald þess bílastæðis sem bifreið er lagt á. Dagsgjald miðast ekki við bókunarverð, heldur verð sem gefin eru upp í innkeyrsluhliði viðkomandi stæðis. Gjaldið sem þú greiddir fyrir bókun á Lagning þjónustunni dregst frá dagsgjaldinu.

    5.3. Ætlir þú að sækja bíl fyrr en gefið var upp í bókun verður þú að láta bílastæðaþjónustu Isavia vita ekki seinna en tveimur tímum fyrir áætlaðan tíma útkeyrslu í síma 425-6400, svo að bíll verði tilbúinn. Látir þú ekki vita, eða látir vita of seint, gætir þú þurft að bíða á meðan bíllinn þinn er sóttur.

    5.4. Ætlir þú þér að afhenda Isavia bíl meira en tveimur tímum fyrr en áætlað var í bókun verður þú að láta bílastæðaþjónustu Isavia vita. Þú munt þurfa að greiða fyrir þann tíma sem leggst við upphaflega bókun.

    5.5. Þú átt ekki rétt á endurgreiðslu bílastæðisgjalds þó tíminn sem bílnum er lagt sé af einhverri ástæðu styttri en gert var ráð fyrir í bókun. Þetta á einnig við ef flugi er aflýst.

    5.6. Isavia ber ábyrgð á lyklum bifreiða sem fyrirtækið hefur í umsjá sinni. Isavia ber ábyrgð á bifreið við flutning hennar til og frá bílastæðunum þar sem hún er geymd. Verði bifreiðin fyrir skemmdum á meðan hún stendur á bílastæðum, sjá 14. grein um ábyrgð.

    5.7. Það er á þinni ábyrgð að kanna ástand bifreiðar þegar hún er sótt og áður en henni er keyrt út af svæði Keflavíkurflugvallar. Teljir þú að skemmdir séu til komnar vegna meðhöndlunar Isavia verður þú að koma því á framfæri með kvörtun áður en þú ekur út af bílastæði.

    6. Póstlisti

     6.1. Við skráningu á póstlista samþykkirðu að fá send tilboð og þjónustukannanir frá Isavia á formi tölvupósts. Jafnframt veitirðu samþykki fyrir að við vinnum með þær upplýsingar sem þú gefur upp, nafn og netfang, í þeim tilgangi að veita þjónustuna. Hægt er að skrá sig af póstlista hvenær sem er með því að smella á þar til gerðan tengil í einum af tölvupóstunum.

    6.2 Skráir þú þig af póstlistanum eyðum við þessum upplýsingum. Að öðru leyti gilda skilmálar um meðhöndlun Isavia á persónuupplýsingum, sjá grein 14.

    7. Verð

    7.1. Verð er gefið upp í íslenskum krónum (ISK)

    7.2. Isavia ber ekki ábyrgð á prent- og innsláttarvillum, þ.m.t. villu í verðum, verðbreytingum og uppfærslu á verðum.

    8. Breytingar á bókun

    8.1. Mögulegt er fyrir þig að breyta bókun fram að 4 klst. fyrir bókaðan tíma innkeyrslu í gegnum bókunarkerfi https://www.kefairport.is/, hægt er að breyta dagsetningu og tíma innkeyrslu og útkeyrslu af bílastæði.

    9. Tafir

    9.1. Tími innkeyrslu er staðfestur í bókunarstaðfestingu sem þú færð í tölvupósti við bókun.

    9.2. Isavia skal tryggja að bókað stæði sé til reiðu þremur tímum fyrir bókaðan tíma innkeyrslu.

    10. Kvartanir

    10.1. Allar kvartanir skulu berast beint til Isavia, sjá grein 1.3.

    10.2. Kvartanir um ófullnægjandi þjónustu og/eða vöru skulu berast eins fljótt og þú verður þess var, og eigi síður en 5 dögum eftir að þú hefur keyrt út af bílastæðum.

    11. Vanefndir

    11.1. Isavia skal tryggja að bílastæði sé til reiðu fyrir þig það tímabil sem bókað hefur verið. Bílastæði inni á svæðinu sem bókað hefur verið er ónúmerað. Ekki verður litið á uppfærslu í sambærilegt eða dýrara stæði sem brot á samkomulagi Isavia við þig sem skapast við bókun.

    11.2. Ef Isavia getur ekki veitt sambærilegt eða dýrara stæði en það sem bókað var, sjá grein 13.1, átt þú rétt á bótum vegna brostins samkomulags, þ.m.t. endurgreiðslu bílastæðagjalds.

    11.3. Isavia áskilur sér rétt til þess að láta fjarlægja bifreiðar sem er ólöglega lagt. Þú þarft að leysa út bifreið á eigin kostnað.

    12. Ábyrgð

    12.1. Ákvæði um ábyrgð sem talin eru upp hér gilda ekki umfram það sem kveðið er á um í íslenskum lögum.

    12.2. Isavia ber ekki ábyrgð á slysum, þjófnaði, slysum á fólki, skemmdum á bílum, búnaði á eða í bíl, en sjá grein 5.6.

    12.3. Isavia ber ekki ábyrgð á óbeinu eða afleiddu tapi.

    13. Force Majeure

    12.1. Sé ekki hægt að veita vöru og/eða þjónustu að einhverju eða öllu leyti vegna óviðráðanlegra aðstæðna, aðstæðna sem Isavia hefur enga stjórn á, þ.m.t. en ekki bundið við, stríð, hryðjuverk eða hryðjuverkaógn, eldsvoða, verkföll, sniðgöngu, lokun flugvallar og náttúruvá, þá frestast afhending á vöru og/eða þjónustu um þann fjölda daga sem óviðráðanlegar aðstæður valda.

    13.2. Í tilfelli Force Majeure ber Isavia enga ábyrgð.

    14. Persónuupplýsingar

    14.1. Gögn frá notendum eru meðhöndluð í samræmi við gildandi lög og reglugerðir um persónuvernd og vörslu gagna.

    14.2. Til þess að bóka og greiða fyrir bílastæði verður þú að gefa upp nafn, símanúmer, tölvupóstfang og bílnúmer. Þessar upplýsingar eru nauðsynlegar til þess að geta veitt umbeðna þjónustu og eru unnar á grundvelli samningsheimildar.

    14.3. Þú getur hætt við bókun áður en þú staðfestir viljirðu ekki veita umbeðnar upplýsingar.

    14.4. Upplýsingar sem þú veitir verða einungis notaðar við vinnslu bókunar. Vinslan fer fram hjá Isavia ohf og KMP Digitata  og verða ekki afhentar öðrum aðilum.

    14.5. Þegar greiðslu er lokið verða greiðsluupplýsingar þínar vistaðar í þann tíma sem það tekur færsluna að skila sér til Isavia. Greiðsluupplýsingar eru vistaðar í samræmi við PCI (Payment Card Industry – Data Security Standard) staðla. Kjósir þú að vista kreditkortanúmer er það einnig geymt í samræmi við PCI staðla.

    14.6. Gögnum sem safnað er fyrir Lagning þjónustuna, og eru umfram þau gögn sem getið er á um í greinum 13.1 – 13.5 eru einungis safnað í þeim tilgangi að geta varist lagalegum kröfum.

    14.7. Isavia safnar ekki persónuupplýsingum, þ.e. Isavia safnar ekki upplýsingum sem hægt er að rekja niður á einstaka persónur, í lengri tíma en tilgangur söfnunar krefst og lög og/eða reglugerðir segja til um.

    14.8. Þú getur óskað eftir gögnum sem við höfum safnað um þig vegna veittrar þjónustu með því að senda inn beiðni hér https://www.isavia.is/fyrirtaekid/um-isavia/fyrirtaekid/hafdu-samband/minar-personuupplysingar. Þú hefur einnig rétt á því að láta okkur eyða þeim persónupplýsingum sem við höfum safnað um þig. Þú hefur rétt til þess að mótmæla söfnun gagna og getur lagt inn kvörtun hjá Persónuvernd. Eyðublað fyrir kvörtun má finna inni á https://www.personuvernd.is.

    14.9. Þegar þú ferð inn á vefsfæði https://book.kefairport.is/book/KEF/Parking , er gögnum, í formi kaka (e. cookies) safnað um notkun þína.

    14.10. Beindu vinsamlegast öllum spurningum varðandi gagnasöfnun til Isavia.

    15. Kvartanir

    15.1. Vinsamlegast hafðu samband við Isavia ef þú vilt koma kvörtun á framfæri. Hægt er að hafa samband við bílastæðaþjónustu Isavia í síma 425-6400 eða í tölvupóstfangi parking@isavia.is

    15.2. Ef þú nærð ekki samkomulagi við Isavia er varðar kvörtun geturðu komið kvörtun á framfæri við Neytendastofu með því að senda póst á postur@neytendastofa.is.

    16. Lög og lögsaga

    16.1. Um skilmála þessa og samninga milli Isavia og viðskiptavina á grundvelli þeirra fer samkvæmt íslenskum lögum. Rísi ágreiningur um skilmálana, samninga byggða á þeim eða annað er lítur að leigu bílastæða á Keflavíkurflugvelli verða mál vegna slíks ágreinings rekin fyrir Héraðsdómi Reykjavíkur.

    17. Endurskoðun/breyting skilmála

    17.1. Isavia getur hvenær sem er breytt skilmálum þessum með því að uppfæra þessa vefsíðu.