Tvær nýjar setustofur (lounge) á Keflavíkurflugvelli
Isavia leitar að öflugum og reynslumiklum samstarfsaðila til að reka tvær nýjar setustofur (lounge) í suðurbyggingu Keflavíkurflugvallar. Þetta verður í fyrsta sinn í sögu Keflavíkurflugvallar sem farþegar geta borgað sig inn í setustofu óháð því með hvaða flugfélagi þeir fljúga. Þetta tækifæri samanstendur af tveimur staðsetningum sem hvor um sig þjónar sérstökum markhóp innan Keflavíkurflugvallar. Önnur setustofan er á brottfararsvæði utan Schengen á 1. hæð og hin er á 3. hæð á Schengen svæðinu.
Útboðið var auglýst á Evrópska efnahagssvæðinu. Útboðsgögnin voru gefin út 9. júlí sl. og útboðsferlið er því hafið.
Grab´n Go, Delicatessen (sælkeraverslun) og snjall-sjálfsala tækifæri í norður- og suðurbyggingu
SSP í Noregi, sem er hluti af alþjóðlega fyrirtækinu SSP Group, vann útboðið í rekstri tveggja Grab´n Go verslana í norður- og suðurbyggingu, sælkeraverslunar í norðurbyggingu og snjall-sjálfsala á sjö staðsetningum á Keflavíkurflugvelli. Stefnt er að opnun verslananna í norðurbyggingu ásamt sjálfsölunum í lok hausts og mun verslunin í suðurbyggingu, að öllum líkindum, hefja rekstur núna í vetur.
Fimm nýir veitingastaðir bætast við veitingaflóru Keflavíkurflugvallar
Lagardère Travel Retail reyndist hlutskarpast í útboði á rekstri „Food Market“ á Keflavíkurflugvelli og stefnt er að opnun veitingastaðanna á næsta ári.
Þrír veitingastaðir munu rísa í aðalbyggingu flugvallarins á nýju veitingasvæði til austurs, þar sem hlýleg, notaleg og afslöppuð upplifun verður í fyrirrúmi. Þetta eru staðirnir Yuzu, La Trattoria og Zócalo.
Á 1. hæð í suðurbyggingu flugvallarins mun nýr íslenskur veitingastaður opna, Keflavík Diner, og veitingastaðurinn Sbarro sem er mörgum góðkunnur.
Loksins Café & Bar og Bakað
Lagardère, átti hagkvæmasta tilboðið í útboði á rekstri kaffihúsa á Keflavíkurvelli og stefnt er að opnun þeirra á þessu ári. Loksins Café & Bar verður á 2. hæð í suðurbyggingu og Bakað verður á tveimur svæðum; 1. og 2. hæð norðurbyggingar.
Tveir nýir veitingastaðir á 2. hæð norðurbyggingar
SSP í Noregi, hluti af alþjóðlega fyrirtækinu SSP Group, átti hagkvæmasta tilboðið í útboði á rekstri tveggja veitingastaða sem opnaðir verða á Keflavíkurflugvelli um vorið 2023.
Fyrirtækið mun reka veitingastað í samstarfi við íslenska fyrirtækið Jómfrúnna og hefja rekstur á bístró-stað undir nafninu Elda þar sem meistarakokkurinn Snorri Victor Gylfason mun sjá um þróun og hönnun á öllum réttum.